久不久網上就會有討論，話「香港嘅西人唔學中文，可以用返英文係對佢哋嘅優待」。然後就會有海外港僑表示自己去到外國一定要學外語融入，但西人可以講英文就得，如果外國人來香港只要住夠七年就可以得到永久居留權，而又唔需要考語文試；相反大部份歐美國家及日本等國要入籍有語言要求，對香港人好唔公平，接受嘅人係殖民心態嘅奴才唔夠本土云云。
亦有香港人表示自己嘅歐裔另一半學粵語，但同本地人以粵語溝通會被人照用英文回答，所以難以融入。而反駁一方（認為白人優越主義）嘅人，就會話如果個個外國人都學廣東話，而個個外國人流利粵語，香港人根本唔會default白人九成唔識粵文，佢哋會遇到呢啲狀況，個責任都係在於個外國人自己係白人嗰度。
首先，香港行粵英雙語，兩個語言都去到起碼可以溝通到先最理想。
香港白人學粵文個問題我好多分享，先講結論：
我認為唔同嘅社會歷史同埋來者是否「過客」心態影響，多過什麼「種族主義」同「殖民心態」。
白人或其他不論膚色外國人好多只係「過客」，來香港做幾年嘢就走。香港就算有幾多所謂儒教迂腐定小農嘅問題都仍被稱為「國際城市」，除咗咩國籍嘅人都有、世界多國有領事館/商業組織/私人公司喺香港等，亦係因為商業語言係英語，因此方便各國人士共同工作同繼續令外國公司來香港設分公司、投資中心。事實不該每每想到英文係為方便白人，版主不少朋友係其他國家嘅亞洲人或南美人，英文都方便埋佢地。英文的確係國際商業語言，既然香港係「國際商業社會」，工作只有英文係唔出奇（版主以前工作嘅公司都係以英文為主，而好多香港公司都係）。對於呢班不諳漢文嘅人，生活上只懂英語其實亦有對佢哋唔方便嘅地方，但係既然佢哋無心去學，有唔方便都只係唔方便佢哋自己。但係又因為居港外籍人士同本地非港裔人士唔少（有約20%香港人係英語或其他東亞語言為母語），所以有不少店鋪餐廳亦以英文為主：可能選擇少咗，但係佢哋去呢啲店鋪就可以避免生活上嘅不便，呢啲係第二個話題。
點解外國人住香港「唔使」學粵語？只要諗一諗。當個商業環境唔需要佢哋用英文以外嘅語文，好多人亦只係幾年合約，難得旅居一個五光十色嘅小國「梗要玩盡佢」，加上新工作、新生活環境，基本上多數無動力同無時間學。呢啲就係所謂嘅「過客」。唔同香港人同好多其他國家嘅人，去歐洲國家生活長住一定要先學個語言，否則生存唔到。（前年讀完德文再喺本地德國公司工作，得我一個亞洲人/非德國人，又住得遠來回四小時到公司，工作已經好大壓力，仲要夜晚去上德文堂惡補，心諗如果間公司只講英文搞掂，生活已經寫意好多，但即使當自己可以唔駛學德文，居住環境同搞證件、搬遷等問題已經令你可以忙到死。加埋要學德文係百上加斤。）可惜請我份工唔係英文公司，而德國好多所謂講英文嘅公司好多時溝通/email/開會都係用返德文，你唔明你嘅事，唔同香港嘅外企公司真係全英語。老實講我唔覺得咁樣係源於「專重自己語言」，只係唔人性化嘅操作而已，亦會增加工作上嘅誤會。事實係兩邊環境無得比，唔係雙重標準，而係社會、歷史、政治令到兩個情況根本上無從比較，如果吓吓覺得係白人至上主義而覺得…